Раднаева Галина Жигмытовна
| Раднаева Галина Жигмытовна | |
|---|---|
 | |
| Түрэһэн үдэр | 1949 оной январиин 15 |
| Түрэһэн газар | Буряад-Монголой АССР, Зэдын аймаг, Бага Нарын һуурин |
| Гражданство | |
| Ажаябуулгын янза | Ирагуу найрагша, сэтхүүлшэн, аман зохёолшо |
| Жанр | Уянга |
| Зохёолнүүдай хэлэн | Буряад хэлэн |
| Шангууд |
«Литературная Россия» сэтхүүлэй шангай лауреат Буряад Уласай гүрэнэй шангай лауреат |
| Шагналнууд | Оросой Холбоото Уласай соёлой габьяата хүдэлмэрилэгшэ |
Раднаева Галина (Санжи-Сурун) Жигмытовна ― Оросой буряадай ирагуу найрагша, Буряадай соёлой габьяата хүдэлмэрилэгшэ, Буряад Уласай Арадай уран зохёолшо, Оросой Холбоото Уласай соёлой габьяата хүдэлмэрилэгшэ, «Литературная Россия» сэтхүүлэй шангай лауреат, Буряад Уласай гүрэнэй шангай лауреат[1].
Намтар
Буряад-Монголой АССР-эй Зэдын аймагай Бага Нарын тосхондо 1949 оной январиин 15-да түрэһэн юм.
Һургуулида һуража байхадаа, шүлэг бэшэжэ эхилһэн байна: 5-дахи ангида шүлэгэй түхэлөөр найруулга бэшэжэ, багшанарай үндэр сэгнэлтэдэ хүртэһэн байха. Уданшьегүй Галинын шүлэгүүд аймагай сониндо, «Байгал» сэтгүүлдэ толилогдожо эхилээ. 1967 ондо Буряадай залуу уран зохёолшодой болон гуурһаяа туршажа эхилһэн зохёогшодой 7-дохи хуралдаанда хабаадаа, тэндэ Раднаевагай зохёохы ажалнуудынь үргэн зүбшөөлгэдэ хүртөө һэн.
Бургалтайн дунда һургуули дүүргээд, «Зэдын үнэн» сониной редакцида хүдэлмэрилөө, удаань, 1970 онһоо Москва хотодо Максим Горькиин нэрэмжэтэ Уран зохёолой дээдэ һургуулида һураа. 1975 ондо һуралсалаа дүүргээд, Буряад оронойнгоо аймагуудай сонинуудта алдуу заһагшаар, оршуулагшаар, «Буряад Үнэн» сониндо сэтхүүлшэнээр, Буряадай телевидени болон радиодо уран зохёолой ба уран һайханай дамжуулгын редактораар, этнограф Мария Данчиноватай суг хамта «Сэнхир хадаг» гэһэн дамжуулга хүтэлбэрилдэг байгаа.
Раднаева Уран зохёолой дээдэ һургуулиин 2-дохи шатын оюутан байхадаа, 1972 ондо түрүүшынгээ «Уянга» гэжэ шүлэгүүдэй согсолбори хэблүүлээ һэн. Дээдэ һургуулиингаа түгэсхэлэй жэлдэ иимэ согсолбори хэблүүлээ — «Наран тээшэ» (К солнцу) (1975 он).
1977 онһоо СССР-эй Уран зохёолшодой холбооной гэшүүн болоно (Цырен-Дулма Дондоковагай һүүлээр Буряадай эхэнэр ирагуу найрагшадай хоёрдохинь)[2].
1979 ондо хэблэгдэһэн «Набшаһадай һаршаганаан» (Шелест листьев) гэһэн шүлэгүүдэй суглуулбариингаа түлөө 1980 ондо Буряадай АССР-эй Ленинэй комсомолой шангай лауреат болоһон. Удаадахи жэлнүүдтэ «Ээрсэг» (Веретено) (1983), «Хун шубуун» (Полет лебедей) (1987), «Хэтэ, сахюур…» (Огниво, кремень) (1992), «Үлхөө шүрэнүүд» (Коралловое ожерелье) (1993), «Талын булаг» (Родник в степи) (1994), «Гуламтын гал» (Огонь в очаге) (1997) гэһэн шүлэгүүдэй ба поэмэнүүдэй согсолборинууд хэблэгдээ.
Улаан-Үдэ, Москва хотонуудта «Белый месяц» (Москва, 1983, 1989), «Огонь в очаге» (1986), «Пробуждение» (Москва, 1990) гэһэн согсолборинуудынь ород хэлэн дээрэ хэблэгдэһэн байна. 1996 ондо 4 хубиһаа бүридэһэн «Түрэлгын зоболон» («Муки рождения») гэһэн согсолбори хэблэгдээ.
Галина Раднаева уран шүлэгүүдые бэшэхэһээ гадуур Зэдын буряадуудай арадай аман зохёолоор баримтануудые суглуулха, болбосоруулха, хэблэхэ ажал эрхилдэг юм.
Тэрэнэй ирагуу найруулганууд соо түүхын мэдэрэлэй бии байһан, тойроод байһан дэлхэйгээ уран бэлигтэнэй гүн гүнзэгыгөөр шадажа бариһаниинь, түрэл нютагтаа зүрхэнэй холбоотой байһаниинь эли тодоор ойлгогдоно.
Нэрэ зэргэнүүд ба шагналнууд
- «Оросой Холбоото Уласай соёлой габьяата хүдэлмэрилэгшэ»
- «Буряад Уласай Арадай уран зохёолшо»
- «Буряад Уласай соёлой габьяата хүдэлмэрилэгшэ»
- Зэдын аймагай Хүндэтэ эрхэтэн (2008 он)[3]
- «Литературная Россия» сэтхүүлэй шангай лауреат
- Буряад Уласай гүрэнэй шангай лауреат
Тиихэдэ үшөө харагты
- Базаржапова Галина Хандуевна
- Будажапова Евгения Дампиловна
- Дашиева Татьяна Цыреновна
- Дондокова Нимацырен Данзановна
- Доржиева Дулгар Ринчиновна
- Ленхобоева-Артугаева Нина Токтохоевна
- Серова Ольга Васильевна
Ажаглалта
- ↑ Раднаева Галина. Дата обращения: 11 март 2022. Архивировано 21 февраль 2020 года.
- ↑ Раднаева Галина Жигмытовна. Дата обращения: 11 март 2022. Архивировано 11 март 2022 года.
- ↑ Творчество Галины Раднаевой (реферат)