Цыденов Алексей Самбуевич
| Цыденов Алексей Самбуевич | |
|---|---|
_2.jpg) | |
|
| |
| 2017 оной сентябриин 22 (Уялгануудые саг зуура гуйсэдхэгшэ: 2017 оной февралиин 7 — сентябриин 22 ) |
|
| Юрэнхылэгшэ | Владимир Путин |
| Урид ажаллаһан хүн | Вячеслав Наговицын |
 "Ниитэ нэгэн Орос" гэһэн намай Буряадай нютаг можын таһагай секретарь
 |
|
| 2020 оной мартын 11 | |
| 2012 оной июниин 18 — 2017 оной февралиин 7 | |
 Холбоото уласай түмэр замай агентствын хүтэлбэрилэгшэ
 |
|
| 2011 оной февралиин 27 — 2012 оной майн 15 | |
| Урид ажаллаһан хүн | Геннадий Петраков, Владимир Чепец |
|
|
|
| Түрэһэн үдэр |
1976 оной мартын 16 Петровск-Забайкальскда, Шэтэ можо, РСФСР, СССР |
| Наһанай нүхэр | Ирина Цыденова |
| Үхибүүд | Илья, Георгий, Лев, Кира |
| Нам | Ниитэ нэгэн Орос |
| Болбосорол |
1. ДВГУПС 2. РАНХиГС |
| Шагналнууд | |
| Сайт | glava.govrb.ru |
 РУВИКИ.Медиа дахи Медиафайл | |
Цыденов Алексей Самбуевич СССР-эй РСФСР-эй Шэтэ можын Петровск-Забайкальский хотодо 1976 оной мартын 16-да) түрэһэн юм. Оросой гүрэн түрын ажаябуулагша, улас түрын бодолгошон. Оросой Холбоото Уласай Унаа тээбэриин сайдай орлогшо (2012—2017). 2017 оной сентябриин 22-һоо Буряад Уласай Толгойлогшо (2017 оной февралиин 7-һоо сентябриин 22 болотор Толгойлогшын уялга саг зуура дүүргэгшэ) байһан. «Ниитэ нэгэн Орос» гэһэн намай Буряадай нютаг можын таһагай секретарь, тус намай Дээдын зүблэлэй гэшүүн.
Намтар
Шэтэ можын (мүнөө — Үбэр Байгалай хизаар) Петровск-Забайкальский хотодо 1976 оной мартын 16-да хэдэн үе түмэр замшадай гэр бүлэдэ түрэһэн юм. Эсэгэнь, Самбу Цыденович Цыденов — Оросой Холбоото Уласай габьяата түмэр замшан, техническэ эрдэмэй дид-доктор. Эхэнь, Любовь Трофимовна Цыденова (Шутюк) эдэй засагшанаар ажалладаг байһан.
Эрдэм һургуули
1993 ондо Шэтэ хотодо 5-дахи дунда һургуули дүүргээд, Үбэр-Байгалай түмэр замай унаа тээбэриин дээдэ һургуулида ороһон юм. «Ашаа тээбэри дээрэ (түмэр замай) зөөлгэ эмхидхэлгэ ба хүтэлбэри» гэһэн мэргэжэлээр онсо шалгарһанай тэмдэгтэй диплом 1998 ондо Хабаровскда абаһан байна.
Оросой Холбоото Уласай Юрэнхылэгшын дэргэдэхи Оросой арадай ажахын ба гүрэнэй албанай академидэ мэргэжэлээ дээшэлүүлгын бэлэдхэл 2011 ондо гараа.
Ажалай зам
Оюутан ябаха үедөө Цыденов дээдэ һургуулиингаа профсоюзай ударидагша ябаа, хожомынь тэндээл ниигэмэй-эдэй засагай хүгжэлтын таһагта ажалайнгаа намтар эхилээ. Оюутан хаһадаа Алексей Цыденов Бооржо-Москва гэһэн холын замай галта тэргын вагон сэбэрлэгшээршье ажаллаһан байха юм.
Дээдэ һургуули дүүргэһэнэй һүүлдэ 1998 онһоо 2001 он болотор Алас Дурнын түмэр замай хүтэлбэридэ нягталан бодогшоор, хэлтэсэй даргаар, маркетингын болон хэлсээ баталалгын ажалай таһагай даргаар хүдэлмэрилөө.
2002 онһоо 2004 он хүрэтэр — «Дальнефтетранс» гэһэн хизаарламал харюусалгатай хамжаанай юрэнхы захирал. Хажуугаарнь мүн баһа «Дальсибнефтетранс», «Дальсибнефтетрансвосток» хамжаануудай захиралаар ажаллаа.
2004 онһоо 2006 он болотор Цыденов — «Алас Дурнын унаа тээбэриин бүлэг» («Дальневосточная транспортная группа») гэһэн хуби ниилүүлһэн нээмэл түхэлэй хамжаанай юрэнхы захиралаар ажаллаһан байгаа. Хамжаанууд тус тустаа газарай тоһо ба ой модо зөөхэ ажал эрхилдэг һэн.
Мүн тиихэдэ 2004 онһоо года «Сахауглетранс» гэһэн хуби ниилүүлһэн хаамал түхэлэй хамжаанай эзэн байгааа (2016 ондо тэрэ хамжааниинь хаагдаа).
2006 ондо Цыденов гүрэнэй албанда оробо. 2006—2009 онуудта — Оросой Холбоото Уласай Унаа тээбэриин яаманай түмэр замай унаа тээбэриин һалбарида бэелүүлэгдэхэ гүрэнэй бодолгын департаментын захиралай орлогшо.
2009 онһоо 2011 он болотор — Оросой Холбоото Уласай Засагай газарай Аппарадай таһагай дарга, Үйлэдбэриин болон оршон хангалгын байгуулгын департаментын захиралай орлогшо.
Оросой Юрэнхылэгшын хүтэлбэрилхы ажаллаашадай нөөсэ тобьёгто — 2010 онһоо.
2011 оной декабриин эсэсһээ 2012 оной июнь болотор — Оросой түмэр замай холбоото уласай агентствын хүтэлбэрилэгшэ.
2012 оной июнь һараһаа 2017 оной февралиин 7 болотор Цыденов — Оросой Холбоото Уласай унаа тээбэриин сайдай орлогшо. Түмэр замай һалбариин, унаа тээбэриин согсолборито объектнүүдэй, тэрэ тоодо автомобилиин харгынуудай, далайн эрьеын оршон хангалгын байгуулгын түлөө харюусалгатай һэн. Онсолходо, Мурманскын унаа тээбэриин уулзуурай барилга харгалзалдаг байгаа. Тэрэшэлэн, засагай зургаанайнгаа информатизациин болон усадхагдаһан Росхилые шэнэдхэн эмхидхэлгын асуудалнуудаар ажал ябуулаа. Мүн тиихэдэ ажаябуулгын хэмжээндэ ГЛОНАСС-ай технологиие газар дээрэ хэрэглэлгэ, зуурандын пунктнууд дээгүүр гарадаг ашаа зөөлгэ, яаманай холын хараатайгаар түсэблэлгэ ородог һэн.
2016 онһоо 2017 он хүрэтэр Цыденов «Оросой түмэр харгынууд» гэһэн хуби ниилүүлһэн нээмэл түхэлэй хамжаанай захиралнуудай зүблэлэй бүридэлдэ ородог байгаа.
Буряад Уласай Толгойлогшо
Оросой Холбоото Уласай Юрэнхылэгшэ Владимир Путинай зарлигаар А. Цыденов 2017 оной февралиин 7-һоо Буряад Уласай Толгойлогшоор һунгагдаһан хүнэй тушаалдаа оротор Буряад Уласай Толгойлогшын уялга саг зуура дүүргэһэн юм.
2017 оной сентябриин 22-һоо — Буряад Уласай Толгойлогшо.
2018 оной июлиин 18-һаа 2019 оной январиин 28 болотор, һүүлээрнь 2020 оной декабриин 21-һээ Оросой Холбоото Уласай Гүрэнэй Зүблэлэй түрүүлэгшэнэрэй зургаанай гэшүүн.
2018 оной декабриин 8-да «Ниитэ нэгэн Орос» гэһэн улас түрын намай XVIII ехэ хурал дээрэ А. Цыденов тус намай Дээдын зүблэлэй бүридхэлдэ оруулагдаһан байна.
2020 оной мартын 11-һээ «Ниитэ нэгэн Орос» гэһэн намай Буряадай нютаг можын һалбариин секретарь.
2017 оной сентябриин 10-най һунгалта
87,43 % һунгагшадай зүбшөөл абажа, А. Цыденов һунгалта шүүжэ гараа.
2017 оной сентябриин 22-то Алексей Самбуевич Цыденов Буряад Уласай Толгойлогшын тушаалда ороһон юм.
Ажаябуулгын гол дүнгүүд
Шэнжэлэгшэдэй хэлэһэнэй ёһоор Цыденовэй толгойлдог Буряад Уласай Засагай газарай 2017-2022 онуудта ябуулһан эдэй засагай талаар бодолго хадаа доройтолтой тэмсэлгын бодолго байгаа. Шиидхэгдээгүй эгээл хэсүү асуудалнуудые шиидхэхэ ба усадхаха, улас түрын хамагай шухала һалбаринуудые дэмжэлгэдэ хэрэгтэй мүнгэ холбоото уласай түбтэ бэдэрхэ ажалда тэрэ бодолгонь зорюулагдаһан байха юм.
2022 оной сентябриин 11-нэй һунгалта
2022 оной сентябриин 11-дэ Буряад Уласай Толгойлогшын һунгалтада түрүүшын шатада Цыденов илалта туйлахадаа, һунгагшадай 86,23 % дуунда хүртэжэ, хоёрдохи болзорто һунгагдаа.
Гэр бүлэ
Эсэгэнь — Самбу Цыденович Цыденов (1950 оной июлиин 26-да Шэтэ можын (мүнөө Үбэр-Байгалай хизаар) Бооржо хотодо түрэһэн), түмэр замшан. Хабаровскын түмэр замай инженернүүдэй дээдэ һургуули «Түмэр харгынуудые барилга, зам ба замай ажахы» гэһэн мэргэжэлээр 1972 ондо дүүргэһэн байна. Үбэр-Байгалай түмэр замай Карымай хэсэгтэ ажаллаһан. Удаань түмэр замай ажахыда элдэб тушаалнуудта 20 гаран жэл хүдэлмэрилөө. 2003 ондо Самбу Цыденов гүр бүлөөрөө Хабаровск зөөжэ, зам шэнжэлэн үзэдэг харгын түбэй даргаар ажаллаа. Гурбан жэлэөй үнгэрхэдэ, Зохёон бүтээлгын-технологиин бюродо ахамад инженерээр ажаллажа эхилээ. 2009 оной апрель һараһаа даргань болоо. Ажалдаа габьяатай байһанайнь түлөө С. Цыденовтэ 2012 ондо хүндэтэ түмэр замшанай нэрэ зэргэ олгогдоо. Түмэр замай харгынуудые һэльбэн харууһалха талаар техническэ хэрэгсэлнүүдые зохёоһон тухай долоон патенттэй юм.
Эхэнь — Любовь Трофимовна Цыденова (гарбалаараа Шутюк, 1951 оной августын 1-дэ Амарай можын Новорайчихинск тосхондо түрэһэн). Тэрэнэй эсэгэ Трофим Дорофеевич Шутюк Эсэгэ ороноо хамгаалгын Агууехэ дайнай үедэ Амарай можодо партизануудай нюуса объектнүүдэй барилгашан ябаһан. Любовь Цыденова түмэр замда экономистын тушаалда ажаллаһан юм.
Алексей Цыденов һамгатай, дүрбэн үхибүүтэй.
Наһанаайнь нүхэр Ирина Викторовна Цыденова мэргэжэлээрээ эмшэн, мүнөө гэр бүлынгөө гуламтаяа сахижа байдаг хүн. Шэтэ хотодо физикэ-тоо бюодолгын һургуули дүүргэһэн. Шэтын гүрэнэй аргын академи, Алас Дурнын гүрэнэй аргын ехэ һургуули түгэсэһэн, фтизиопульмонолог эмшэнэй мэргэжэлтэй.
Ууган хүбүүн Илья (2001 ондо түрэһэн) Бауманай нэрэмэжэтэ МГТУ дүүргээ. 2005 ондо түрэһэн Георгий хүбүүниинь оюутан. 2009 ондо түрэһэн Кира басаганиинь ба 2016 ондо түрэһэн одхон Лев хүбүүн хоёрынь — һургуулиин һурагшад.
Хэһээлтын хэмжээн
Донецкын болон Луганскын Арадай Уласуудые Орос Гүрэнэй тоодо орохо тухай зүбшөөлгэ Оросой Юрэнхынэгшэ В. В. Путинэй абаһан шиидхэбэри Алексей Цыденов дэмжэһэн байна. Тиихэдээ 2022 оной февралиин 22-то Буряад Уласай ажаһуугшадта иигэжэ хандаһан байна:
Манай гүрэнэй Юрэнхылэгшэ хүндэхэн, тиигээшье һаа, болохо аргатай гансахан зүб шиидхэбэри абажа, Донбассай — Донецкын болон Луганскын Уласуудай хэдэн арбаад мянган ажаһуугшадай ами наһа абараа. Иимэ шиидхэбэри абажа, бүхы дэлхэйдэ Орос гүрэниие тоонгүй байжа болохогүй гэжэ харуулба. Харин хэрбэеэ һулаханаар байгаа һаамнай, Баруун зүгэйхид тэрэниие зүбшөөхэгүй. Эдэй засагай талаар хорото ябадалынь үргэлжэлхэ. Маниие бахалуурдажал байха. Харин бусад гүрэнүүд маниие тулюур гээд, манһаа арсажа, саашаа хараха. Дэлхэй дээрэ ганса Штадууд болон Европо бии бэшэ. Зүүн-Урда Азиин, Латин Америкын гүрэнүүд бии, эдэй засагай харилсаа холбоо хүгжөөхэ арга боломжонууд байна. Теэд тэдэ ганса хүсэ шадалтай, айдаггүй, сухаридаггүй Оростой харилсаха бшуу! Мүнөө бидэнэр ганса Донбассые аршална бэшэбди — өөһэдынгөө ерээдүйе хамгаалнабди! Эсэгэ ороноо хамгаалагшын үдэрэй урда манай Армиие онсолон тэмдэглэжэ, манай сэрэгшэдтэ хүсэ шадалайнь, эрэлхэг зоригойнь түлөө баяр баясхалан хүргэхэ һанаатайб. Илалта туйлажа, гэртээ амиды мэндэ бусахыень хүсэнэб. Владимир Владимирович, Та зүб шиидхэбэри абаат! Бидэ Тантай хамтабди!
2022 оной сентябриин 22-то Оросой Холбоото Уласай Юрэнхылэгшын «Оросой Холбоото Уласта сэрэгтэ зарим хуби таталга соносхохо тухай» зарлиг зүбшөөһэн байха юм:
Би мүнөө этигэмээр ямаршьеб даа үгэнүүдые хэлэхэ ёһотой болоно хаб. Теэд минии һанахада, хамаг зон бүхы юумэ ойлгожо байна. Манда ёһотой дай соносхоод байна ха юм. США болон Европо Оросые эрид хурсаар үзэн ядадаг дайсадые Украинада үндылгөө, тиигээд лэ маниие шэлэхыемнай баалаа: нэгэ гэбэл — бидэ, үгы гэбэл — тэдэ. Нэгэн гээ һаа, бидэ амиды үлэхэбди, үгы һаа — үгы. Энэ хоёрой хоорондо ондоо шиидхэбэринүүдэй үгы байһаниинь голхормоор. Сүлөөлэгдэһэн газар дэбисхэр дээрэ һаяын сагта һаналаа хуряалга үнгэргэгдэхэ, тиигээд энэ газар дээрэ Баруунай үндылгэн номнодог манай гүрэниие, Эхэ оронииемнай үзэн ядалга болон аюул үгы болохо. Сэрэгэй тусхай ябуулгада заатагүй илалта туйлаха гээшэ — шухалын шухала.
2023 оной февралиин 24-дэ Америкын Холбоото Штадуудай гүрэнэй департамент Цыденовые хэһээлтын хэмжээнэй тобьёгто оруулһан байна.
2023 оной апрелиин 1-һээ Украин Уласай хэһээлтын хэмжээн доро байна.