Владимир Путинай хабаадалгатай сэхэ дамжуулга (2024)

Владимир Путинай хабаадалгатай сэхэ дамжуулга (2024)
Оросой Юрэнхылэгшэ Владимир Путин сэхэ дамжуулгын үедэ (2024)
Түрүүшын удаа үнгэргэгдэһэн һара үдэр	2021 оной декабриин 24
Үнгэргэлгын тоо гурим	жэл бүри
Эмхидхэгшэ	Оросой Холбоото Уласай Юрэнхылэгшын Захиргаан

Владимир Путинай хабаадалгатай сэхэ дамжуулга (2024) — Оросой Холбоото Уласай Юрэнхылэгшэ Владимир Путинай сэхэ дамжуулгатай хамтаруулагдаһан жэл бүриин пресс-хуралдаан. 2024 оной декабриин 19-дэ агаарай долгиндо сэхэ дамжуулагдажа гараһан байна. Элдэб арга түхэлөөр (утаһаар, СМС-мэдээсэлээр ба Интернедээр) сэхэ дамжуулгада ороһон хандалгануудай тоо 2,2 саяһаа олон болоо.

Бэлэдхэл

Тусхай сахим хабсарагалтын, СМС-мэдээсэлнүүдэй туһаар, утаһаар, «ВКонтакте» ба «Одноклассники» гэһэн ниигэмэй сүлжээнүүдтэ, мүн тиихэдэ moskva-putinu.ru (москва-путину.рф) сайт дээрэ 2024 оной декабриин 8-най 00:00 сагһаа декабриин 19 болотор Оросой Юрэнхылэгшэдэ эльгээгдэһэн бэшэмэл ба видеоасуудалнууд суглуулагдан абтаһан байна.

2024 ондо «Арадай фронтын» штабта call-түбэй хүдэлмэрилэгшэд анха түрүүшынхиеэ хэмэл ухаа хэрэглэжэ, эрхэтэдэй хандалгануудай шэнжэлэл хэһэн байха юм. GigaChat нейрогүльмэ ниигэмэй сүлжэнүүдээр ороһон мэдээсэлнүүдые, аудиомэдээсэлнүүдые ба SMS-үүдые шэлэгдэһэн сэдэбүүдээр хубаарилжа эмхилээ.

2024 оной декабриин 11-дэ Москвада «Сберэй» түб офисто Владимир Путин хүрэжэ, хэмэл ухаанай һалбарида хэгдэжэ байгаа зүйлнүүдэй үзэсхэлэн хараа. Тиихэдэнь сэхэ дамжуулгада хандахадаа, ямар орёо асуудалнуудые эрхэтэдэй табижа байһан тухайнь гүрэн түрын толгойлогшые GigaChat уридшалан танилсуулаа:

Ямар асуудалнудта бэлдэхэб, ямарнуудынь олон бэ гэжэ мэдэгдэбэ: гэр байрын шанар шэнжэ ба абахада бэлэн байха ушар, унаа тээбэриин һалбари, эмнэлгэ, гүрэнэй албан зургаанууд ба эмхинүүд, тэдхэбэри түлбэри.

Сэхэ дамжуулгада хандахадаа, эрхэтэдэй табиһан асуудалнуудай гол сэдэбүүдтэй Владимир Путин танилсаба (2024)

2024 оной декабриин 18-най мэдээгээр элдэб арга янзаар сэхэ дамжуулгада ороһон хандалгануудай тоо 2,2 саяһаа олон болоо. Үгтэһэн мэдүүлгэнүүдэй тоогоор Түбэй, Баруун-Хойто болон Урда федеральна тойрогууд түрүүлнэ. Эгээл олоор дурдагдаһан сэдэбүүд гэхэдэ, нютаг можонуудые газаар хангалга, түлишэ болон ЖКХ-гай туһа хангамжануудай сэнгэй нэмэлгэ, сэрэгэй тусхай ябуулгада хабаадагшадые болон тэдэнэй гэр бүлэнүүдые дэмжэлгэ болоно.

2024 оной дүнгүүд

Дамжуулгын гол сэдэбүүдэй тоодо Оросой ниигэмэй бодолгодо хабаатай (хандалгануудай 20%), гэр байратай (9%), эдэй засагатай (9%), элүүрые хамгаалгатай (8%), гэр байрын болон коммунальна ажахытай (8%), Украин Уласта үнгэргэгдэжэ байһан сэрэгэй тусхай ябуулгатай холбоотой асуудалнууд(6%) байгаа.

Эдэй засаг

Улас түрын толгойлогшо гүрэнэй эдэй засагай байдал 2024 ондо «тогтууритай ба найдамтай» гэжэ тодорхойлоо, ВВП-гэй ургалтые 3.9% тухай, 2025 ондо 2.5% байха гэжэ багсаамжалаа. Тиихэдээ энээнииень ЕС-эй байдалтай (2024 ондо - ургалтагүй ВВП) болон Америкынхитэй (6% тухай) зэргэсүүлһэн байна. Мүн Орос гүрэндэ ажалгүй зоной үсөөн байһан ушарта (2,3%) анхаралаа хандуулһан байна. Тиихэдэ Владимир Путин Орос гүрэнэй үйлэдбэриин һалбарида элдүүрилгын үйлэдбэриин хэмжээн ехээр дээшэлээ, энэнь гүрэн түрымнай бүрин бэеэ даанги байдалые бэхижүүлһэн тэмдэг болоно гэжэ онсолбо.

Владимир Путин: «Гүрэнэй эдэй засагай байдал тогтууритай ба найдамтай»

2024 ондо 9% хүрэһэн мүнгэнэй хямдаралга (инфляци) тухай хэлэхэдээ, юрэнхылэгшэ энэнь бодотошье, мүн бодото бэшэшье шалтагаануудтай гэжэ хэлэбэ. Бодото шалтагаануудай тоодо:

• Орос гүрэндэ хэрэглэлгын ургалта;
• дэлхэйн үнэ сэнгэй нэмэлгэ логистикын һалбарида нүлөөлнэ.

Бодото бэшэ шалтагаануудай тоодо:

• мүнгэнэй хямдаралгада нүлөөлхэ аргатай сэнгэй гол хэмжүүртэй холбоогүй хэрэгсэлнүүдые Түбэй банкын саг соонь хэрэглээгүй байһан ушар;

• зарим һалбаринуудые хүгжөөхэ талаар Оросой Холбоото Уласай Засагай газарай хожомдожо ябуулһан ажал.

Оросой Холбоото Уласай шэнэ гэжэ нэрлэгдэдэг нютаг можонуудай эдэй засагай байдал Юрэнхылэгшэ амяарнь тодорхойлходоо, татабари суглуулгын дээшэлһэн тухай хэлээ: ЛНР-тэ - зуунай 90 хубяар, ДНР-тэ - 79%, Херсоной, Запорожиин можонуудта - 200 хубяар.

Сэрэгэй тусхай ябуулга

Владимир Путин далайн ябаган торгон сэрэгэй 155-дахи амяараа бригадын тугтай (2024)

Сэрэгэй тусхай ябуулгын үнгэргэдэжэ байгаа дэбисхэр дээрэ ямар байдал тогтоод байнаб гэжэ хэлэхынгээ урда тээ далайн ябаган торгон сэрэгэй 155-дахи амяараа бригадын сэрэгшэд дайшалхы тугаа дамжуулаа гэжэ хөөрэхэдөө, тэрэниие задалжа харуулхые гуйгаад, урагштайгаар ябажа, Илалта туйлаад, амгалан һайнаар гэртээ бусахыень тэдэнэртэ хүсэбэ. Гүрэнэй толгойлогшын хэлэһээр, үдэр бүри сэрэгшэд бүхы фронтын шугамаар урагшаа дабшаад, «дүрбэлжэн километрээр» дэбисхэр сүлөөлнэ.

Украинын Зэбсэгтэ хүсэнүүдые Ород гүрэнтэй хилэһээ хэзээ һөөргэнь түлхихэб гэжэ асууһан Курск можын ажаһуугша эхэнэртэй хөөрэлдэхэдөө, «хүбүүд дайлалдана, эгээ мүнөө байлдаан боложо байна» гэжэ тайлбарилаад, «бидэ тэдэниие заатагүй бута сохин, лаб үлдэхэбди» гэжэ найдуулаа. Курскын можодо һалгаагдаһан техникын тоо 2023 ондо бүхы фронтын шугамаар усадхагдаһан танкнуудай, ябаган сэрэгэй дайшалхы болон бусад техникын тооһоо үлүү болоо гэжэ Оросой ударидагша тэмдэглэбэ. Гэхэтэй хамта, бүхы хохидоһон граждан болон ниигэмэй объектнүүдые һэргээхэ, гэр байраяа алдаһан ажаһуугшадта гэр байра абаха үнэмшэлгэ үгтэхэ тухай мэдүүлээ, энэ хэрэгтэ 108 миллиард түхэриг һомологдоо гэжэ Владимир Путин мэдээсээ. Мүн баһа Херсоной, Запорожиин можонуудые, ЛНР болон ДНР һэргээн бодхоохо тухай хэлсэгдэһэн байна. Тодорхойгоор хэлэбэл, гурбан жэлэй туршада эдэ можо нютагуудай харгын сүлжээн тааруу хэбтэ хүргэгдэжэ, Азов далай тойроод, дүрбэн зуруудтай тойруу харгы баригдаха юм. Мүнөө дээрээ 20 мянганһаа олон социальна болон гэр байрын объектнүүд һэргээгдээ.

Владимир Путин сэхэ дамжуулгын үедэ (2024)

Юрэнхылэгшэ мүн лэ сэрэгэй тусхай ябуулгада (СВО-до) хабаадуулагдажа байһан сэрэгшэдтэ Алууршад дээрмэшэдтэй тэмсэлгын үйлэ ябуулгада (КТО-до) хабаадагшадай зиндаа бэшэ, харин дайшалхы үйлэ ябуулгын хабаадагшадай зиндаа олгохо тухай асуудалнуудаар һанамжаяа элирхэйлбэ. Тэрэнэй хэлэһээр, буруу һүрэһэн энэ хэрэг зүб тээшээ заһагдаха, тиигээд сэрэгшэд «үгтэхэ ёһотой бүхы юумэ абаха, бидэ тэрэнииень саг тэхэрюулэн тоологдохо».

Сэрэгэй тусхай ябуулгада хабаадагшадай тооһоо хүтэлбэрилхы тушаалтанай нөөсэ бэлдэхэ шэглэлтэй «Баатарнуудай үе саг» гэһэн программын хэр зэргэ бэелүүлэгдэжэ байһые Владимир Путин сэгнэбэ. Сэрэгэй тусхай ябуулгада хабаадаһан оюутадтай уулзаһанай удаа иимэ түр һургуулинуудые зохёохо бодол намда түрөө гэжэ Юрэнхылэгшэ хэлээ. Тэрэнэй хэлэһээр, сэрэгэй алба хаагшадай дундаһаа томо хамжаануудые, нютагай засагай байгууламжануудые, яаманууд болон засагай бусад зургаануудые хүтэлбэрилхэ зониие шэлэхэ хэрэгтэй:

Эндэ нэгэшье дэгэд һүрэгдөөгүй...Олон зондо дурадхал оруулагдаа, олзын хэрэг руушье, засагай бүхы шатын зургаанууд руушье оронод.

Гол бодолгото аюулгүй байдал

«Орешник» гэһэн дайшалхы ракетын согсолбориин добтололгые НАТО-гой сэрэгүүдэй тогтоохо шадабари тухай Баруун зүгэйхидэй хэһэн мэдүүлгэнүүдые тайлбарилан һанамжалхадаа, Владимир Путин туршалга хэхэ тухай дурадхал оруулба:

«Баруун зүгэйхид ба Украин Улас Киевтэ газар тодорхойлжо, агаарай хамгаалгын бүхы системэеэ тэндэ суглуулаг, бидэ «Орешнигээрээ» добтолон сохихобди, харин тэдэнэр тэрэнииемнай тодоод барижа абажа туршаг, тиигээд саашаа юун бологшо ааб гэжэ харахабди».

Энэ дайшалхы ракетын согсолборидо яагаад нэрын шэлэгдэһэн тухай Юрэнхылэгшэ иигэжэ хэлээ: «Сэхэ руунь гү? Мэдэнэгүйб».

Уласхоорондын хэмжээнэй хэлсэхэ зүйлнүүд

Сэхэ дамжуулгын үедэ мүнөө үеын уласхоорондын харилсануудта хабаатай хэдэн асуудалда Владимир Путин харюусаа. Тодорхойгоор хэлэбэл, Сириин Юрэнхылэгшэ байһан Башар Асадай Москва зөөжэ ерэһэнэйнь удаа үшөө уулзаагүй байһанаа мэдүүлээ, тиихэдэ Оросой Сиридэ табиһан зорилгонууд бэелүүлэгдээ, юундэб гэхэдэ, «алууршад дээрмэшэдэй хэсэг дэбисхэр» тэндэ байгуулгада Оросой Зэбсэгтэ Хүсэнүүд эсэргүүсэжэ шадаһан байна бшуу. NBC-гэй сэдхүүлшэнэй «Сэрэгэй тусхай ябуулгынгаа зорилгонуудые Орос гүрэн бэелүүлжэ шадаагүй, генералнуудаа алдана, һулараад байна» гэжэ хэлэһэндэ харюусахадаа, Ороснай һүүлэй жэлнүүдтэ һулараа бэшэ, харин эдэй засагаа, бэеэ даанги байдалаа, үүрынгөө хамгаалха шадабарияа бүри шангадхаа:

Оросые һулараад байхыень та харахаяа тон ехээр хүсэнэт, харин би ондоо һанамжатайб.

Москвада генерал Игорь Кирилловэй алуулһаниие ами наһандань добтолго гэжэ нэрлэһэн американ сурбалжалагшые Владимир Путин баһал үгэ дээрэнь барижа абаа. Тиигээшье һаа, тусхай албанууд «энэ сохилтые уридшалан һэргылэнгүй үлөө» гэжэ Юрэнхылэгшэ тэмдэглээ.

Хитадай мэдээсэлэй «Синьхуа» агентствын түлөөлэгшэ Оросой Холбоото Уласай ба Хитадай Арадай Улас хоёрой хоорондохи хамтын ажалай хэмжээе сэгнэхыень гуйба. Харюу болгон, Юрэнхылэгшэ хоёр гүрэнэй хоорондохи худалдаанай эрьелтэ 200 миллиард долларто хүрөө, хүрэнгэжүүлгын түсэлнүүдэй тоо 600 болоо, мүн лэ нютаг можонууд хоорондын хамтын ажаллалгын хэмжээн ургаа гэжэ тэмдэглэбэ:

Манай нютаг можонуудай хүтэлбэрилэгшэд Хитадай түлөөлэгшэдтэй хамтын ажалда хабаадалсахань баһал тон шухала. Тэндэ хатуухан харашье байха, теэд хэмжүүртэйхэн.

Ниигэмэй бодолго

Хүн зоной түрэхэ, нүгшэхын, ажаһуугшадай олон болохо асуудал Орос гүрэндэ эгээл шухала орёо асуудалнуудай нэгэн гэжэ нэрлэбэ, юундэб гэхэдэ, нарайлалгын хэмжээн 1,41 хуби хүрэжэ, хамагай доодо хэмжээндэ буугаа, үхибүү түрэхэ наһанай эхэнэрнүүдэй тоо 30 хубяар доошолоо. Владимир Путинай хэлэһээр, үхибүүдэй түрэлгэ адагынь 2,3% хүрэтэр дээшэлүүлэгдэхэ ёһотой. Гүрэнэй талаһаа үзүүлэгдэдэг дэмжэлгын хэмжээнүүд тухай хэлэдээ, юрэнхылэгшэ эжынэрэй капиталай программа, гэр бүлын ипотекын программа, үхибүүтэй гэр бүлэнүүдтэ нэгэдхэһэн тэдхэмжэ түлэлгэ тухай тэмдэглээ.

Нүүдэлшэдэй бодолгын асуудалые «аргагүй хүндүүлхэй» гэжэ гүрэн түрын толгойлогшо нэрлээ. Тэрэнэй һанамжаар, нүүдэлшэдэй тоо үсөөрүүлхын тула дээдэ арга зүйн технологиин һалбаринуудта анхарал хандуулха замаар хүдэлмэриин үрэ дүн дээшэлүүлхэ хэрэгтэй. Тиихэдэ Орос гүрэндэ ажаллахаяа ерэһэн зондо табигдадаг эрилтэнүүд шангадхагдаха, хариһаа ерэгшэдэй Оросой Холбоото Уласай соёлой онсо шэнжэнүүдые ойлгожо, хэлэ мэдэхынь тула болбосоролой хэсэгые һайжаруулха шухала. Оросой ударидагшын хэлэһээр, зарим алхамууд хэгдэнхэй. Жэшээнь, ород хэлэ мэдэхэ үхибүүдые һургуулинуудта абаха тухай хуули абтаа.

Элүүрые хамгаалга

Эмнэлгын газарнуудта хүдэлмэрилэгшэд дуталдана гэһэн Доодо Новгород хотын ажаһуугша эхэнэрэй гомдолдо Владимир Путин харюу үгэбэ. Тэрэнэй хэлэһээр, эмшэдэй эгээл олоор дуталдал элүүрые хамгаалгын эхин шатын һалбарида үзэгдэнэ, энэ талаар залуу кадрнуудые татаха, мүн ажалай хэмжүүр зүбөөр хубааха гэһэн асуудал нютагай засагай байгууламжануудай урда табигданхай. Мүн сэхэ дамжуулгын үедэ эм найруулгын үйлэдбэри хүгжөөхэ, өөһэдын эмүүдые үйлэдбэрилхэ тухай хэлсэгдэһэн байна.

Интернет

Орос гүрэндэ YouTube гэгшын удаан ажалладаг болоһон тухай Влад А4 блогер Владимир Путинай һанамжа асууба. Тус талмайн эзэн болохо Google хамжаан Оросой Холбоото Уласта ажалладаг өөрынгөө жэжэ хамжаануудтаа гаргашалдаг мүнгэеэ багаар һомолдог боложо, тоног түхеэрэмжыень хангалта хизаарлаһан ушарһаа тус албан тулгардажа ажалладаг болонхой гээд гүрэн түрын толгойлогшо харюусаа.

Гүрэн түрын түрүү ажал ябуулагшад тухай

Дамжуулгын үедэ Владимир Путин Орос гүрэнэй болон хари гүрэнүүдэй олон тоото гүрэн түрын ажабуулагшад тухай һанамжаяа хэлээ. Илангаяа хэнтэй сай ууһан тухайгаа асуудалда харюусахадаа, тэрэ Гельмут Колиие һанаба:

Канцлер Кольтой уулзахаар һэм... Герман Уластаа ехэ юумэ хэһэн гүрэн түрын бодолгын томо ажаябуулагша һэн.

Украин Улас ба Дундада Зүүн тушаа Владимир Жириновскиин лүндэнгүүд тухай дамжуулга хүтэлэгшын хэлэһэндэ һанамжалан харюусахадаа:

Ехэрхүүлхэ, аашалха дуратайшье һаа, айхабтар ухаатай, олон юумэ мэдэхэ, бэлэдхэл һайтай хүн байгаа. Тиимэһээ тэрэнэй хэһэн багсаамжалганууд тудадаг байгаа юм ааб даа: тэдэ бодото дүй дүршэл болон эрдэм мэдэсэ дээрэ үндэһэлэнхэй байдаг байгаа.

Хантер хүбүүгээ хүлисэһэн Байден тухай:

Шам дотор хэниинь ехэб: түрын бодолгошон гү, али хүн гү - энэ ходол шухала. Байденай зосоо хүниинь ехэ байшоо.

Борис Ельцин тухай:

Баруун гүрэнүүдтэ Ельциндэ дуратай байгаа юм, теэд Белградые бомбодоһон тухай хоолойгоо шангадхан сасуунь, тэрэ дороо хойноһоонь орожо, архиншан гэжэ муушалдаг болоо һэн.

Зеленскиин ерээдүй тухай:

Мүнөө хэндэ хангамжа үзүүлнэб, тэдэ хүнүүд лэ тэрэниие тэдхэмжэдээ абаха.

Юрэнхылэгшын хөөрэһэн шог зугаа

Оросойнгоо дотоодын орёо асуудалнууд тухай бүри ехээр бодохо хэрэгтэй гэжэ сэхэ дамжуулгын үедэ һануулхадаа, Юрэнхылэгшэ шог зугаа хөөрэбэ:

Гэр бүлэ хоол бариха шэрээдээ һууна. Хүбүүниинь эжыһээ һурана: "Кроссворд соо яамр үгэ гурбан үзэгһөө бүридэнэб?". Тиин сасуугаа духа руугаа халбагаар сохюулба. Удаань һамганиинь духа руугаа халбагаар үбгэндөө сохюулба. "Гэр тухайгаа бодохо хэрэгтэй", - гэбэ тэрэнь.

Харагша олон

Mediascope гэһэн шэнжэлэлгын хамжаанай мэдэсээһээр «Жэлэй дүнгүүд - Владимир Путинтай» гэһэн сэхэ дамжуулга 17 сая харагшад хараһан байна. Гэхэтэй хамта, бүхы субагуудаар хараһан зоной хуби (теледамжуулга хаража байһан хүнүүдэй дунда зэргын тоо, харагшадай ниитэ тоогой хубяар илгаруулагдана) 63.4% хүрөө. Дамжуулгын сэгнэлтэ (теледамжуулга хаража байһан хүнүүдэй дунда зэргын тоо, бүхы хүн зоной хубида) 12.5% ​​хүрөө. Иимэ телесубагуудаар дамжуулга харуулагдаа:

• Нэгэдэхи субаг;
• «Россия-1»;
• «Россия-24»;
• НТВ;
• «Соловьев Live»;
• «Мир»;
• «Табадахи субаг»;
• РЕН ТВ.

Дамжуулгын дүнгүүдээр абтаһан шиидхэбэринүүд

Засагай газарай Түрүүлэгшын орлогшо Дмитрий Чернышенко ажаһуугшадай олон гомдолнуудые засагай газарай зохилдуулгын түбтэ ехэнхидээ мэтэр хаража үзэдэг байгаа гэжэ мэдээсэбэ. Засагай зургаанууд хоорондын харилсаха арганууд хэрэглэгдээ гэжэ тэмдэглэгдээ, тэрээн соо бүхы һалбаринуудые харгалзалдаг сайдуудай туһалагшад иимэ асуудалнуудые шиидхэбэ:

• олон хүүгэдтэй гэр бүлэнүүд агаарай замда хахад сэнгээрнь ябадаг болохонь (Засагай газарай Түрүүлэгшын орлогшо Виталий Савельев энээн тухай даабари Транспортын яаманда үгэбэ; 2025 оной январиин 14-һөө 12 наһа гүйсөөгүй бүхы үхибүүдтэ иимэ хямдарал үгтэхэ);
• урьһаламжа бүридхэхэ үгэхэ хоёрой хоорондо «хүйтэрүүлгын болзор» нэбтэрүүлхыень банкнуудые уялгалха (иимэ болзор 50 мянган түхэригһөө дээшэ урьһаламжануудта хэрэглэгдэхэ, 4 сагһаа хоёр үдэр хүрэтэр хугасаатай байха);
• Засагай газарай Түрүүлэгшэ Михаил Мишустин Курскын можо хамгаалагшадта сэрэгэй тусхай ябуулгын бусад хабаадагшадтай адли түлбэри абаха эрхэ олгоһон баримтануудта гараа табиба;
• хүнгэлэлтэтэй ипотекын гүрэнэй программаар үгтэхэ мүнгэн хизаарлалтагүй гэжэ соносхогдоо;
• гэр бүлын ипотекэ хуушан гэр байра худалдаанай дэлгүүртэшье хэрэглэхээр үргэдхэхэ тухай дурадхагдаа;
• Хээлитэй ба нарайлһан эхэнэрнүүдтэ түлэгдэдэг тэдхэмжэ ажамидаралай доодо хэмжээн хүрэтэр дээшэлүүлхэ тухай дурадхал оруулагдаа (оюутан ябаад, эжы болоһон эхэнэрнүүдтэ түлэгдэдэг тэдхэмжэ 17 мянган түхэриг болотор дээшэлжэ болохо гээд Оросой Холбоото Уласай Ажалай болон ниигэмэй талаһаа хамгаалгын сайд Антон Котяков мэдүүлээ);
• бага олзотой гэр бүлэнүүдтэ ниигэмэй хэлсээнэй боломжые ойротуулха тухай дурадхагдаһан байна.

Ажаглалта

Энэ материалай зохёохы эрхын эзэн — «РУВИКИ» — интернедэй шэнэ нэбтэрхэй толи» гэһэн АНО.
Гансал «РУВИКИ» — интернедэй шэнэ нэбтэрхэй толи» гэһэн АНО-гой зүбшөөлөөр энэ материал бусад сайтнуудта хэрэглэжэ болоно.