Доржиева Мэдэгмаа Цырендоржиевна
| Доржиева Мэдэгмаа Цырендоржиевна | |
|---|---|
| Түрэхэдэнь үгтэһэн нэрэ | Цыбикжапова Мэдэгмаа Цырендоржиевна |
| Дүүрэн нэрэ | Доржиева Мэдэгмаа Цырендоржиевна |
| Мэргэжэлнүүд | Буряадай дуушан, пианистка, хүгжэм зохёогшо, продюсер |
| Хүгжэмэй зэмсэгүүд | Фортепиано |
| Жанрнууд | Үндэһэн-поп хүгжэм |
| Далда нэрэ | Доржиева |
| Шагналнууд | Буряад Уласай габьяата зүжэгшэн |
Доржи́ева Мэдэгмаа Цырендоржи́евна, эсэгынгээ обогоор — Цыбикжапова (бур. Доржын Сэрэндоржын Мэдэгмаа; 1980 ондо түрэһэн, Зугмаара һуурин, Петровск-Забайкалиин аймаг, Шэтэ можо) — буряад дуушан, пианистка, хүгжэм зохёогшо, продюсер, Буряад Уласай габьяата зүжэгшэн.
Намтар
Мэдэгмаа Доржиева 1980 оной сентябриин 7-до Шэтэ можын Петровск-Забайкалиин аймагай Зугмаара һууринда түрэһэн юм[1]. Мэдэгмаагай эсэгэ — сэрэгэй ниидэгшэ (лётчик), эхэнь - хүгжэмшэн.
Мэдэгмаагай хүгжэмшэнэй бэлиг бага наһанһаань элирһэн юм. Улаан-Үдэ хотодо урлалай 4-дэхи һургуулида ба П.И. Чайковскиин нэрэмжэтэ хүгжэмэй колледждо (фортепианын анги) һураһан юм.
Зүүн-Сибириин гүрэнэй соёлой дээдэ һургуули улаан үнэмшэлгэтэйгээр түгэсэһэн.
Оросой Холбоото Уласай Юрэнхылэгшын дэргэдэхи Арадай ажахын ба гүрэнэй албанай Оросой академиин менеджментын һалбариин үнэмшэлгэ 2005 ондо абаһан намтартай. Эдэ засагай эрдэмэй дид-доктор.
Дуу дуулаха ба хүгжэм зохёохо абьяас бэлиг, һонирхолынь ябан ошон мэргэжэлынь болошоо.
Урданай ба мүнөө үеын буряад дуунуудые Мэдэгмаа үндэһэн-поп аялгын жанраар гүйсэдхэдэг. Өөрынгөө олон дуунуудай хүгжэмыень өөрөө захёоһон байха юм. Тэрэнэй найруулганууд заншалта буряад дуунуудые шэнээр, мүнөө сагайхяар зэдэлүүлдэг.
2009 ондо Мэдэгмаа анха түрүүшынхиеэ кинематографто бэеэ туршаба. Тиихэдэ «Az ойрхон» («Аза жаргал хажуудаа») гэһэн гэмтэ ябадалай удхатай монгол драмада наадаһан юм[2].
Жэл бүриин «Алтан лимбэ» гэһэн арадай шангай гуримаар хоёр удаа, 2010 ба 2011 онуудта «Буряадай түрүү эмэгтэй дуушан» гэһэн нэрэ зэргэдэ хүртэһэн[3].
Дуунуудайнгаа гурбан альбом гарганхай. Өөрынгөө дуунуудта видеоклипүүдые буулгадаг[4], мүн тиихэдэ Буряадай гүрэнэй телевидениин захилаар хүжэмэй дамжуулгануудые зохёон бүтээдэг.
Мэдэгмаа Доржиевагай «Шэнэ долгинууд — Новая волна» гэһэн продюсерэй түб саг үргэлжэ мүрысөөнүүдые үнгэргэжэ, бэлигтэй залуу дуушадай залуур боложо, замынь нээжэ үгэдэг юм.
Мэдэгма Доржиева Франциин, Италиин, Ирландиин, Сингапурай, Америкын Холбоото Штадуудай, Хитадай хүгжэмшэдтэй харилсаа холбоотойгоор ажалладаг[2].
Шагналнууд ба нэрэ зэргэнүүд
- Буряад Уласай Толгойлогшо В. Наговицынай 2016 оной ноябриин 29-нэй зарлигаар Мэдэгмаа Доржиевада «Буряад Уласай габьяата зүжэгшэн» гэһэн хүндэтэ нэрэ зэргэ олгогдоһон юм[5].
- «Буряадай эрхим эмэгтэй дуушан» — 2010 ба 2011 онууд.
Ажаглалтанууд
- ↑ ИЗВЕСТНАЯ ПЕВИЦА, КОМПОЗИТОР И ПРОСТО КРАСАВИЦА МЭДЭГМА ДОРЖИЕВА.
- ↑ 1 2 Мэдэгма Доржиева открыла Монголливуд.
- ↑ О самом главномнедоступная ссылка
- ↑ «Танцы без правил» от Мэдэгмы Доржиевой.
- ↑ Состоялась торжественная церемония награждения работников культуры и деятелей искусства государственными и ведомственными наградами Российской Федерации и Республики Бурятия.