Буряадай тхэквондистнууд

Тхэквондо
Категори	Дайшалхы урлал
Түрүүшын мүрысөөнэй он	1970-аад онууд
Олимпиин нааданууд	2000 он
Дэлхэйн Чемпионат	1974 он
Уласхоорондын федераци
Нэрэ	Тхэквондогой Бүхэдэлхэйн федераци

Буряадай тхэквондистнууд (ород хэлэн дээрэ - Тхэквондисты Бурятии) - солонгосой дайшалхы тхэквондо урлалаар бэеэ һоридог Буряад Уласай ажаһуугшад. Буряад ороной эрхим тхэквондистнууд 2024 ондо үндэр амжалта харуулжа, Дэлхэйн кубогта илалта туйлаһан байха юм.

Буряадай тхэквондистнуудай үндэр амжалта

Дэлхэйн Кубогта Буряадай тхэквондогой тамиршад шалгаржа гараба. Эдэ мүрысөөнүүд Узбекистан Уласай ниислэл Ташкент хотодо үнгэргэгдөө. Тус мүрысөөндэ дэлхэйн гүрэнүүдһээ 1200-аад шанга тамиршад ерэжэ хабаадаһан юм. Мүрысөөнүүдэй һүүлдэ манай тамиршад гэртээ бусажа, мүрысөөн тухай өөдынгөө һанамжануудаар хубаалдаба. Буряадай тамиршадта Европын чемпионадта хабаадаха эрхэ үгөөгүй, Азииншье чемпионадта ошожо хабаадаха аргагүй байгаа, харин дэлхэйн Кубогта тэдэнэр бүхы шадабарияа харуулһан байна.

Эхэнэрнүүдэй дунда 47 килограмм хүрэтэр шэгнүүр соо «Кубогой» мүрысөөндэ Ангелина Пищалкина илагша боложо, алтан медальда хүртэбэ. А. Пищалкина, Оросой тамирай мастер, тхэквондогой ИTФ-гэй дэлхэйн кубогта хүртэһэн тамиршан иигэжэ хэлэбэ:

Дэлхэйн кубок абахаяа би найдаагүй байгааб. Хабаадагшад ехэ олон байгаа. Тамиршад булта үндэр хэмжээндэ бэлдэлгэеэ хэһэн байба. Уласхоорондын мүрысөөнүүд тон үсөөн болодог, тиимэһээ тамиршад олоороо ерэхэ гэжэ оролдодог. «Ариг Ус», минии дуратай «Ариг Ус» намайе эгээл түрүүн амаршалба. Таанар манай амжалтануудай хойноһоо ходол анхаралтайгаар хинан хаража байдагта, тандаа ехэ баяр баясхалан хүргэнэб.

Тиихэдэ Мария Филатова түрүүшын һуури эзэлжэ, баһа үндэр ендэрэй дээдэ шатада гаража, алтан медаль зүүбэ. Тамирай мастерта кандидат 65 килограмм хүрэтэр шэгнүүр соо 16-17 наһатайшуулай бүлэгтэ мүрысөөндэ хабаадаба. Тхэквондогой ИTФ-гэй дэлхэйн кубогта хүртэһэн тамиршан Мария Филатова иигэжэ хэлэбэ:

Һарын саада тээ би 16 наһатай болооб, энэ дэлхэйн Кубогай мүрысөөнүүдтэ хабаадалга - минии түрүүшын мүрысөөн болобо. Сэдьхэл һанаанай талаар нэгэ бага хүндэхэн байгаа, теэд тэндэ баһал намда адлихан басагад ябана гэжэ би һайн ойлгоод байгааб. Тиимэһээ, бэеэ баряад, тулалдаагаа һайнаар хэжэ гараа һэм.

Анатолий Белоусов, Буряад Уласай тхэквондогой федерациин юрэнхылэгшэ:

Тугаа баряад гарахада, намда аятай зохид байгаа, иимэ эрхэтэй байхада ехэ һайшаалтай. Буряад ороноороо, тамиршадаараа, Эхэ ороноороо омогорхол мэдэрнэ ха юмши. Орос гүрэнэйнгөө, Буряад Уласайнгаа нэрэ нэрлүүжэ байһанаа ерэбэбди.

Хүрэл медаль Оросой Холбоото Уласай тамирай мастер Даниил Заборских гэртээ асараа гээд тэмдэглэе. Оройдоол 10 хоногой үнгэрхэдэ, тамиршад Оросой Кубогта мордохо, тэндэ дэлхэйн чемпионадта хабаадаха тамиршадай шэлэлгэ боложо, суглуулагдамал командын бүридэл элирхэ. Энэнь Италида болохо.

2023 ондо Беларусь Уласай ниислэл Минск хотодо үнгэргэгдэһэн ИTФ-гэй тхэквондогой дэлхэйн нээмэл кубогта манай тамиршад 7 медаль абаа һэн гэжэ һануулая: 4 алтан, 2 мүнгэн, 1 хүрэл.

Ажаглалта