Оцимик Константин Владимирович
| Оцимик Константин Владимирович | |||||
|---|---|---|---|---|---|
 | |||||
| Түрэһэн һара/үдэр | 1919 оной январиин 7 | ||||
| Түрэһэн газар | Оросой хаанта гүрэн, Үбэр Байгалай можо, Карабаиновка һуурин | ||||
| Наһа бараһан һара/үдэр | 1963 оной июниин 21 | ||||
| Наһа бараһан газар | СССР, РСФСР, Буряад АССР, Усть-Баргажан тосхон | ||||
| Хамаадал |
 СССР |
||||
| Сэрэгэй түрэл янзань |
ябаган сэрэг (1941—1943), артиллери (1944—1946) |
||||
| Алба хэһэн жэлнүүд |
1939—1946 (СССР гүрэнэй Зэбсэгтэ хүсэнүүд) 1947—1953 (СССР-эй Дотоодын хэрэгүүдэй яаман) |
||||
| Нэрэ зэргэ |
 ахалагша лейтенант |
||||
| Хуби |
|
||||
| Дайн/байлдаан |
Эсэгэ ороноо хамгаалгын Агууехэ дайн Совет-япон дайн |
||||
| Шангууд ба шагналнууд |
|
||||
Оцимик Константин Владимирович (1919 оной январиин 7 түрэһэн, РСФСР-эй, Үбэр Байгалай можын, Дээдэ Үдын хушуунай, Карбаиновка нютаг — 1963 оной июниин 21-дэ наһа бараһан Буряад АССР, Усть-Баргажан тосхон) — зүблэлтэ гүрэнэй сэрэгшэ, Ажалшад-Таряашадай Улаан Сэрэгэй ахалагша лейтенант. Эсэгэ Ороноо хамгаалгын Агууехэ дайнда ба Совет-япон дайнуудай хабаадагша, Зүблэлтэ Холбооной Баатар (1945 он).
Намтар
Оцимик Константин Владимирович 1919 оной январиин 7-до (ондоо мэдээнүүдээр — январиин 15-да)[1][2] РСФСР-эй Үбэр Байгалай можын Дээдэ Үдын хушуунай[3] Карбаиновка нютагта (мүнөө — Буряад Уласай Хориин аймаг)[4] Владимир Станиславович ба Мария Фёдоровна Оцимигуудай таряашан бүлэдэ түрэһэн юм. Ород яһатан[5]. Хүдөөгэй һургуулиин долоон анги дүүргээ. «Улаан партизан» гэһэн хамтын ажахыда бүридхэгшөөр ажаллаа. Хамтын ажахыда ажаллагша олоной суглаанай шиидхэбэреэр 1936 оной октябрь һарада Константин Владимирович нягталан бодогшын түр һургуулида һурахаар Үнэгэтэй һуурин эльгээгдэһэн байгаа[6]. 1937 оной май һараһаа сэрэгэй албанда татагдатараа хамтын ажахыдаа эд бараа тоолодог бүлэгэй нягталан бодогшоор хүдэлмэрилөө.
Ажалшад-Таряашадай Улаан Сэрэгтэ К. В. Оцимик Загарайн аймагай сэрэгэй комиссариадаар 1939 оной сентябриин 9-дэ татагдаһан байна. Алас Дурна зүгтэ, Де-Кастри тосхондо, Декастриин бэхижүүлэгдэмэл 104-дэхи газарта уялгата албаяа хаажа эхилээ. 1940 ондо эндэ далайн сэрэгэй баазын болон эрьеын батарейнүүдэй барилга эхилээд, К. В. Оцимик Шэтэ можын Забита үртөөдэ оршодог артиллериин һургуулида һурахаар эльгээгдээ һэн[7]. Харин СССР-эй баруун хилэнүүд дээрэ байдалай хурсадажа эхилһэн ушараар һургуули гараһанайнгаа һүүлдэ тэрэ Одессын сэрэгэй тойрогой Тирасполиин бэхижүүлэгдэмэл газарай һомо сасадаг буу жадата амяараа 64-дэхи батальон руу эльгээгдэһэн байха юм.
Урда зүгэй фронтдо немец-фашис булимтарагшадтай болон тэдэнтэй хамтаржа дайлалдаһан румынуудтай болоһон байлдаануудта К. В. Оцимик дайнай түрүүшын үдэрнүүдһээ хабаадаа. Тернополиин-Мелитополиин сэрэгэй ябуулгада Улаан Сэрэгэй илагдахада, Тернополиин бэхижүүлэгдэмэл газарай сэрэгүүд Одессэ руу ошожо, 1941 оной сентябриин эхинһээ Далай шадарай Амяараа армиин Одессын 1-дэхи дивизиин (сентябриин 11-һээ — буудалгын 421-дэхи дивизи) бүридэлдэ оруулагдаһан юм. Одессые баталан хамгаалалгада хабаадагша. 1941 оной октябрь һарада Одессэһээ нүүжэ гараһанайнгаа һүүлдэ өөрынгөө хэсэгэй бүридэлдэ ябажа, Крымэй хахад арал хамгаалалгада хабаадалсаа. Ялта ба Алушту хотонуудай түлөө байлдаануудта 421-дэхи дивизи горитой ехэ хохидолдо орожо, тараагдаа һэн. Үлэһэн хэсэгүүдынь буудалгын 172-дохи дивизиин нэмэри бүрилдүүлгэдэ оруулагдажа, тэрэнэй бүридэлдэ Константин Владимирович Севастополь хамгаалалгада хабаадалсаһан байна. Зүблэлтэ сэрэгүүдэй Крымдэ булигдаһанай һүүлдэ Кавказ руу тэрэ шэлжэн нүүжэ шадаа. Кавказай түлөө болоһон ехэ тулалдаанда Константин Владимирович хүндөөр шархатаа һэн.
Сэрэгэй эмнэлгын газарһаа К. В. Оцимик артиллериин һургуули руу эльгээгдээ. Тэрэниие дүүргэһэнэйнгээ һүүлдэ, 1944 оной эхиндэ лейтенант К. В. Оцимик Ленинградай фронтын 21-дэхи армиин хюдалгын-танкда эсэргүүсэлгын сэрэгэй 641-дэхи полк руу эльгээгдэжэ, галта буудалгын хэсэгэй захирагшаар томилогдоо. Энэ тушаалда ябажа, Константин Владимирович Ленинград[8] болон Новгород[9], шадар немец сэрэгүүдэй «Хойто зүг» гэһэн бүлэг бута сохилгодо хабаадаа, Ленинградай ба Калининай можонуудые[10] сүлөөлэлсөө. 1944 оной июль һарада Выборгын сэрэгэй ябуулгын үедэ Карелэй шэлэдэ 39,6 гэһэн үндэрэй түлөө байлдаанда тэрэнэй взвод шалгарһан юм. Өөрынгөө сэрэгэй буудалгын хэсэгүүдэй добтололгые дэмжэжэ, лейтенант Оцимигай артиллериин взвод үхэр буунуудаар галдан буудажа, түмэр утаһаар хэгдэһэн дайсанай хаалтанууд соо 9 метр үргэнтэй нүхэ гаргаһан. Добтололгын үедэ взвод сэхэ буудалгын аргаар дайсанай гарай 3 ба тусхай түхеэрэлгэтэй һомо сасадаг 2 буу, танкда эсэргүүсэлгын 1 үхэр буу болон 10 гаран немец сэрэгшэдые хюдаа.
1945 оной январиин эхеэр 21-дэхи арми 1-дэхи Украинска фронтын бүридэлдэ дамжуулагдаа. Сандомир-Силезиин сэрэгэй ябуулгын үедэ артиллериин батарейн захирагша лейтенант К. В. Оцимик Гинденбург хотын хажууда болоһон тулалдаанда[11] хоёр танкын дэмжэлтэтэй, 40 хүрэтэр зотой немец автоматчигуудай добтололгые гэдэргэнь сохиһон байна. Байлдаанай үедэ хоёр танк, дайсанай 26 сэрэгшэд болон офицернүүд, 2 гарай пулемёт усадхагдаа, немец полкын туг буляан абагдаа. Энэ тулалдаанай түлөө Константин Владимирович Эсэгэ ороноо хамгаалгын дайнай 2-дохи шатын орденоор шагнагдажа, ахамад лейтенант болотор дэбжүүлэгдээ.
К. В. Оцимик 1945 оной март һарада Дээдэ Силезиин добтолгын ябуулгада хабаадаһан байна. 1945 оной мартын 19-20-ой тулалдаануудта, Оппельнын шадар хүреэлэгдэнхэй немецүүдэй бүлэгые усадхаха үедэ[12], тэрэнэй ударидалга доро байһан артиллериин батарей дайсанай 6 угтан добтололго гэдэргэнь сохижо, 180 хүрэтэр вермахтын сэрэгшэд болон офицернүүдые үгы хэбэ. Немецүүдэй батарейдэ туласа дүтэлжэ ерэхэдэнь, ахалагша лейтенант Оцимик сэрэгшэдээ хүтэлжэ гардалган тулалдалгада гараа. Тус байлдаанай үедэ дайсанай 23 сэрэгшэд усадхагдаа, үшөө 67-ниинь плендэ абтаа.
Дайнай һүүлшын үдэрнүүдтэ 21-дэхи арми Прагын добтололгын ябуулгада хабаадаа. 1945 оной майн 6-да ахалагша лейтенант К. В. Оцимик урда захын үхэр буутайгаар Чарна-Вода гол гаталжа гараад, Цобтен[13], хотын баруун захада буудалгын газар түхеэржэ эзэлээд, батарейнгээ бусад буунуудай уһан гол гаталалгые хангаһан байна. Байлдаанай үедэ Оцимигай батарей дайсанай 7 добтололго угтан эсэргүүсэхэдээ, 120 гаран сэрэгшэд болон офицернүүдые хюдаһан юм. Байлдаанай эгээ аюултай нэгэ агшанда, батарейн бүһэлүүлээд байхада, артиллериин галта буудалга Константин Владимирович өөр дээрэ дуудан абаа. Батарей абарагдаа, ахалагша лейтенант Оцимик хүндөөр шархатаа һэн. Сэрэгэй эмнэлгын газарта Илалтаяа тэрэ угтаа. Тэндээл байхадаа, СССР-эй Дээдын Зүблэлэй Президиумэй 1945 оной июниин 27-ной зарлигаар Зүблэлтэ Холбооной Баатарай нэрэ зэргын өөртэнь олгогдоһон тухай мэдэһэн юм.
1945 оной августын эхеэр ахалагша лейтенант К. В. Оцимик дахяад зэргэдээ жагсажа, Алас Дурнын 2-дохи фронтын Улаан тугта 2-дохи армиин хюдалгын-танкда эсэргүүсэлгын артиллериин 1628-дахи полкын артиллериин дивизионой захирагшын тушаалда Совет-япон дайнда Квантун сэрэгые бута сохилгодо хабаадаа. Константин Владимирович 1946 ондо сэрэгһээ табигдаһан. Зарим тэды сагай туршада хоол бариха газарнуудай трестдэ ажаллаа. 1947 онһоо 1953 он болотор Буряадай АССР-эй Дотоодын хэрэгүүдэй яаманай бүридэлдэ алба хаагаа. 1950 онһоо Городок[14] хотодо лагериин харуулай взводой захирагшын тушаал эзэлээ. 1953 онһоо Константин Владимирович Галуута нуур хотын хирпиисын үйлэдбэридэ мастераар ажаллаа. Удаань һамганайнгаа үбшэлһэнһөө боложо, Баргажанай-Адаг тосхон зөөжэ ошоһон. Тэндээ тиимэл хирпиисын үйлэдбэридэ ажалладаг байгаа. Удаан саг соо хүндөөр үбшэлһэнэйнгөө һүүлдэ 1963 оной июниин 21-дэ Константин Владимирович наһа бараа. Түрэлхидэй шиидхэбэреэр Үдын Урда бэеын булашада хүдөөлүүлэгдэһэн юм.
Шагналнууд
- «Алтан Одон» медаль (СССР) (27.06.1945).
- Ленинэй орден (27.06.1945).
- Эсэгэ Ороноо хамгаалгын Агууехэ дайнай II шатын орден (06.02.1945).
- Улаан Одоной орден (18.11.1944).
- Медальнууд.
Дурасхаал
- Бюст Героя Советского Союза К. В. Оцимика установлен в городе Улан-Удэ.
- Именем Героя Советского Союза К. В. Оцимика названы улицы в городах Улан-Удэ и Гусиноозёрск и в посёлках Усть-Баргузин и Верхние Тальцы.
Ажаглалта
- ↑ Сайт Герои Страны. the original on 2012-09-27 2012-06-27 үдэртэ хандаһан.
- ↑ Герои Советского Союза. Краткий биографический словарь. Том 2. М.: Воениз., 1988. 2012-06-27 үдэртэ хандаһан.
- ↑ Фактически — на территории, контролируемой Колчаком.
- ↑ Деревня находилась на территории современного Верхнеталецкого сельского поселения, в Хоринском районе Республики Бурятия.
- ↑ Дед К. В. Оцимика был поляком, выходцем из города Лодзь, сосланным в Забайкалье после подавления Лодзинского восстания рабочих в 1864 году
- ↑ Ныне село Заиграевского района Республики Бурятия
- ↑ Ныне посёлок Аларского района Иркутской области.
- ↑ Ныне город Санкт-Петербург
- ↑ Ныне город Великий Новгород
- ↑ Ныне Тверская область
- ↑ Ныне город Забже Польской Республики.
- ↑ Ныне город Ополе Польской Республики
- ↑ Ныне город Собутка Польской Республики
- ↑ Ныне город Закаменск Республики Бурятия
Ном зохёол
- Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2
- Криченивкер Е. М. Золотые Звёзды воинов Бурятии. — Улан-Удэ: Бурятское книжное издательство, 1968. — С. 76—79. — 159 с.
- Криченивкер Е. М., Хилтухин Д. Д. Люди подвига: очерки о воинах Бурятии – Героях Советского Союза. — Улан-Удэ: Бурятское книжное издательство, 1963. — С. 90—93. — 146 с.
- Крайнюков К.В. Часть четвертая. Вперед, на запад! Наступление продолжается // Оружие особого рода. 2-е изд. — М: Мысль, 1984. — С. 591.
Баримта бэшэгүүд
- Общедоступный электронный банк документов «Подвиг Народа в Великой Отечественной войне 1941—1945 гг.». the original on 2012-03-13 2012-06-27 үдэртэ хандаһан.
- Представление к званию Героя Советского Союза. the original on 2012-09-27 2012-06-27 үдэртэ хандаһан.
- Орден Отечественной войны 2-й степени. the original on 2012-09-27 2012-06-27 үдэртэ хандаһан.
- Орден Красной Звезды. the original on 2012-09-27 2012-06-27 үдэртэ хандаһан.
Ссылкэнүүд
- Неизвестные лица Второй мировой. Оцимик Константин Владимирович. 2012-06-27 үдэртэ хандаһан.
- Победители. Герой Советского Союза Оцимик Константин Владимирович. the original on 2012-09-27 2016-05-08 үдэртэ хандаһан.
- Оцимик Константин Владимирович на www.az-libr.ru. 2012-06-27 үдэртэ хандаһан.
- Хоринский район Их именами названы улицы нашего района. 2012-06-27 үдэртэ хандаһан.
- Усть-Баргузин. Выдающиеся жители посёлка. the original on 2012-09-27 2012-06-27 үдэртэ хандаһан.
- Кокорина Любовь Николаевна. Научно-исследовательская работа: Фронтовой путь моего прадеда Константина Владимировича Оцимика. 2012-06-27 үдэртэ хандаһан.
